*मका खरेदी बाबत व्यापाऱ्यांकडून अडवणूक झाल्यास तक्रार करा – अशोक पाटील कृऊबा सभापती . *

पंढरीनाथ पाटील/जामनेर लाईव्ह न्यूज

जामनेर (प्रतिनिधी): – एफ. ए. क्यू.( फेयर एव्हरेज क्वालिटी / वाजवी सरासरी गुणवत्ता.) या दर्जाच्या मका खरेदी बाबत व्यापाऱ्यांकडून अथवा खरेदीदारांकडून आर्थिक अडवणूक किंवा फसवणूक झाल्यास अथवा कमी दराने खरेदी होत असल्यास कृषी उत्पन्न बाजार समिती जामनेर कार्यालयाकडे लेखी तक्रार करावी जेणेकरून अवैधरीत्या शेतीमाल खरेदी करणाऱ्या व्यापाऱ्याविरुद्ध कायदेशीर कार्यवाही करता येईल. असे आवाहन कृऊबा सभापती अशोक पाटील व सचिव प्रसाद पाटील यांनी केले आहे.

सभापती पाटील पत्रकारांशी बोलताना सांगितले की, या हंगामातील मका शेतीमालाचा पेरा वाढल्यामुळे उत्पादन वाढण्याची स्थिती आहे. परंतु बहुतांश शेतकरी एकाच वेळी मका विक्रीसाठी आणत असल्यामुळे मका खरेदी केंद्रावर प्रचंड गर्दी होत आहे. तसेच विक्रीसाठी आणलेल्या मक्यामधील आद्रता तूर्तास जास्त असल्यामुळे सदर मका वाळविण्यासाठी बऱ्याच खरेदीदारांकडे पुरेश्या जागे अभावी मका खरेदीमध्ये अडचणी उद्भवत आहेत. अनेक शेतकरी बांधवांनी त्यांचा मका हमी भावापेक्षा कमी दरात खरेदी होत असल्याच्या व व्यापाऱ्यांकडून त्यांची अडवणूक होत असल्याच्या तक्रारी सुद्धा केलेल्या आहेत.अशा परिस्थितीत शेतकरी बांधवांनी आपला मका, एफ.ए. क्यू.दर्जा नुसार वाळवून सुकवून व टप्प्या टप्प्याने विक्रीसाठी आणावा. जेणेकरून आपली गैरसोय होणार नाही. अथवा आर्द्रतेच्या अतिरिक्त प्रमाणामुळे आर्थिक नुकसान होणार नाही. तसेच बरेच शेतकरी हे ओला मका विक्रीची घाई करीत आहेत. त्यांनी सुद्धा बाजारभावाचा व विक्री योग्य स्थितीचा अंदाज घेऊन घाबरून न जाता योग्य वेळी माल विक्री करावा. हवामान खात्याच्या अंदाजानुसार पुढील दोन दिवस राज्यात वादळी वारा व पावसाची शक्यता आहे.याचाही विचार करून मका विक्रीची घाई करू नये असे आवाहन ही सभापती अशोक पाटील व सचिव प्रसाद पाटील यांनी केले आहे.